表哥結婚喇

由細到大同表哥都好好感情. 加埋家姐. 3 個人真係由細玩大.
好開心到大個左. 大家都有各自的伴侶. 都可以 6 個人好好感情
表哥結婚當日我更加係姐妹團之一.
當日由朝到晚都好忙好忙呀. 真係腳都跛...對鞋仲要俾我著爛左..
搞到要落樓下商場買鞋. 不過真好彩...如果酒樓附近冇鞋賣我真係要著住對爛鞋周圍走呀.

 < 佢地當日的主題係薯蛋頭. 超有心整diy 野

 < 好特別的wedding logo 呢.~~

佢地擺的場地係煌府. 其實我去之前睇forum ..都知道依個集團的野唔係特別好味.
個日去完之後. 真係發覺網上講得無錯. d 野真係好麻麻..
連我依個對食物冇乜要求的人都覺得唔多好味. d 人又趕收工wor.
都未食完野就收野... 都唔知咩態度  

各位. 聖誕快樂呀 !!

往年既聖誕節男朋友都要返工. 大多都係夜晚食飯.
今晚既聖誕男朋友放假. 可以全日俾哂d 時間我.
下午去左睇青衣居屋的示範單位.
但睇完都係覺得唔多值. 呎價都係同一般的私樓冇乜大分別.
加上同男朋友未註冊. 以單身人士抽機會都太微了.
所以應該會放棄.
夜晚就去左黃埔行街. 去outback 食飯 .
但係去到先知道有最低消費....個下勁想拉住男朋友走.
因為outback 我次次去食都唔中意食佢d 扒.
不過去到冇理由就咁走左去. 最後叫左d 野都食唔哂. 拎左返屋企打包.
男朋友仲要8 點幾就話肚餓...又同佢去左去買宵夜.
我發覺我跟住男朋友既生活真係會食多好多野.
想唔肥都難. 可能要我減肥既第一步. 就係要同bf 見少d 面先得.

 

♥ 淘寶小提示 ♥

無意中睇到一個post. 知道有香港朋友用淘寶之後被騙.
諗諗下用左淘寶咁耐. 的確有試過收到貨後發覺貨不對辨.
又試過賣家態度極惡劣極唔合作.
又試過明明退左貨俾佢. 但佢唔退款 
好好彩地. 我次次都係成功可以爭取返退款.
但大家如果係淘寶新手. 亦要多多留意淘寶的細節呀

第一 :  實物圖
相信大家成日都見到好多淘寶link 都係用雜誌相.
我會建議大家盡量唔好買依類店舖的產品. 因為大陸既假野太多.
當然有好多仿款會做得好好..但同樣會有d 好恐怖的仿款.
為左不必要的金錢浪費同埋承受風險.
我係只會買有實物圖的店舖.
但問題係....實物圖有時都會同時在好多間店舖度出現.
依個時候大家可以留意下實物圖上的水印文字. [ 例如店舖名. 店舖 id ]
係咪同店舖一樣. 如果實身圖上冇水印.
就可以睇下間店舖所賣的貨...實物圖背景係咪都係一樣
因為好少會有店舖係100% 抄哂另一間店舖的相片的.
通常都係周圍抄好多圖. 所以依d 奸商大多都係用唔同的實物圖的.
依d 細微野大家要留意. 當然. 如果真係搵唔到一間店舖有實物圖.
就可以睇下評價啦. 通常d 評價都好中肯的.
大家可以參考下.

第二 : 包郵不包郵.
相信大家都會在淘寶買野時發覺.
成日都有包郵字眼...但記住依d 係99.9% 唔會包到香港的.
通常都係包去國內地區. 所以如果大家在淘寶購物時用到順豐到港的話.
可以直接叫賣家扣掉包郵到國內的運費. [ 通常都係 $10 rmb ]
但因為我用開集運. 所以我一向少用依個優惠.

第三 : 售後服務
如果真係咁唔好彩. 遇到貨不對辦的情況.
第一就要聯絡賣家. 同佢地好好傾下個問題.
如果佢地唔承認有責任 or 唔肯退少少錢.
就用劣評佢地啦.
通常佢地都會好怕劣評. 因而主動再同你傾下點和解.
我次次一用到劣評. 九成的店舖都會讓步

有關上面提及的詳情請看 : http://blog.yahoo.com/_PPJSPVV4RE2ZFXCA24O7NZBXKI/articles/900259/index

♥ 12 月 14 -16 的婚展 ♥

上一次去11月的婚展男朋友唔得閒冇去到.
所以今次就拉佢一齊去睇下啦.反正去街都唔知去邊.
但今次的參展商就無美心份, 如果想去買餅卡的blog 友就要等到下年3 月的大型婚展先得呀.

參展商名單 :
http://www.hka.com.hk/init/exhibitor_CWE12.php?act=intro


今次雖然冇美心. 但奇華. 聖安娜同榮華都有份.
所以打算今次入去買住少少唐餅先
同埋去試下婚介. 雖然同男朋友都有心水的店舖
但係都係想試多幾間. 睇多d 款再比較下 ~
另外今次都想去埋睇證婚,婚前檢查同場地佈置 ( 其實我都唔會join. 不過去偷下師都好 ~)

上次有免費飛既我. 今次都唔執輸又去搵免費飛 !
又咁岩俾我搵到有機會拎喎. so lucky ! 

拍拖日 ~ 青衣城Orange Christmas 2012

又到一年一度的聖誕節了. 往年一到聖誕節.
男朋友就會拎住部相機同我周圍去影.
過下佢既相機癮之餘. 都可以陪下我去行下唔同的地方睇裝飾.
今年第一次去的就係青衣城的 Orange Christmas 2012
因為有我最愛的聾貓.
今次商場仲安排左人流限制
入場人數限定30人以內. 每節30 分鐘.
的確係有效減低人數的. 至少唔會入到去都影唔到相嘛.
不過變相在場外就有長長的人龍.
好在同男朋友去到時咁岩撞正冇人.
所以排左 5 分鐘就可以入去啦.
但場地所限. 其實人數30 人都好迫.
如果下次有機會再去都係揀閒日好d 

Cake Pop [ 附食譜 ]

自從睇完小王子媽媽個 blog 之後就好想好想整依個甜品.
終於在上星期得償所願啦.但係賣相差好遠
希望下次整會有進步啦.

食譜如下:
http://blog.yahoo.com/babyprince-world/articles/1052078/category/%26quot%3B%E5%98%A9box%26quot%3B%E6%95%99%E5%AE%A4

蛋撻 (牛油曲奇皮) [ 附食譜 ]

男朋友中意食蛋撻. 所以我就上網搵食譜做.
不過自己做左d 改動. 整出泥好好好好味.
係我食過最好味的蛋撻. hahaha. ( 因為我唔食唔熱的蛋撻..但街邊好少撞岩見到有新鮮出爐賣呀 )
再加上有男朋友幫手. 所以整得特別開心啦. 食落都特別好味 

食譜 :

牛油皮蛋撻 (10-12隻. 視乎模的大細)

牛油 100g

糖霜 55g

麵粉 160g

蛋 半隻 (另外半隻留返做蛋漿)

1. 牛油室溫放軟, 用打蛋器打至軟滑, 糖霜篩過, 混合拌勻
2. 加入蛋液拌勻
3. 將篩過麵粉加入牛油糊中攪拌, 再搓至與牛油完全混合
4. 用保鮮紙包好, 放入雪柜30分鐘 ( 趁這時候做蛋漿 )
5. 將撻皮取出, 搓至軟身無硬粒
6. 分12份 壓入撻模

蛋漿

牛奶   185ml

糖 40g

蛋 2.5 隻 

1. 用熱水將糖攪熔, 放涼
2. 蛋打散, 加入牛奶攪拌
3. 將蛋液過篩, 加入已放涼糖水
4. 將蛋液倒入撻皮內至八成滿
5. 預熱焗爐至200C, 焗至蛋液凝固, 約15-20分鐘
    
   
   
   

♥ 囍 ♥ D.I.Y. ♥ 敬酒香檳杯 - Part 2 ♥

見尋日得閒. 終於搞掂埋對杯了.
痴多左個邊. 睇落好似 Tinker Bell 條裙
愈睇愈中意. 下星期等d 膠水乾埋就要洗一洗佢地.
之後就要入袋好好收藏啦. 如果唔係keep 唔到兩年就慘.

Pre-Wedding 確認日期了

繼上一篇blog 後. 好多謝咁多blog 友關心.
我終於知道咩事了. 原來係耳仔入面d 耳石有少少移位. 好在問題不大.
醫生話我會自己好返. 的確我依個星期終於停止左廿四小時暈船浪啦.~
不過醫生都叫我唔好做運動住. 但其實我報左跳舞班架.
限期在1月中前要跳哂13 堂..依家咁樣跳唔到好無奈.
不過我下星期會試下跳返先. 真係有問題先會停.
唔想白白無左千幾蚊呀. 肉痛死我.
 
另外Pre-Wedding 終於落實日期啦.
會在二月頭的其中一日. 但其實個日一定好涷啦.
我仲要去迪欣湖影.希望個日唔好低過十度啦.
如果唔係我都應該頂到既.
最緊要個d 日子應該會冇乜人.. 因為最近太多人去影畢業相了.
唔想去到同人迫.
而且男朋友咁怕羞去到應該都會好唔自在.
當日要準備的衫同道具同化妝都有了
依家要煩既應該係...究竟我幾時先捨得死去減肥

我只想身體健康 ( 私有化 )

最近發生左D 事好唔開心. 好彩男朋友一直在我身邊陪住我.
令我知道我嫁俾佢係真係冇錯. 我自己知道自己性格都好倔. 所以一直有個人在我身邊包容住我.
我係好感激上天俾我遇到佢 ( 私有化左唔俾佢睇. 費時佢睇完得得戚戚. haha. )

最近身體好似出現左問題. 唔知做乜由前個星期起一直都好頭暈.
起初只係臨訓同訓醒有D 頭暈..
但上個星期就KEEP 住日日都好暈. 真係成個腦都天旋地轉咁.
所以星期二就去左睇醫生啦. 點知醫生話我咁暈. 加上手汗大. 而且腳水腫. ( 其實後兩者係天生的.)
有可能係甲狀腺有事. 之後仲叫我出去等...等陣就抽血去驗下.
個陣得我一個去睇. 而且個醫生係出名講野講到好嚴重 ( 以前腳甲生入肉佢話要鋸左我對腳. 腸胃炎話會脫水至死.... )
所以我同護士講 : 我趕時間呀. 下次再抽啦
點知醫生一聽到就叫我入去即抽.
抽完返屋企係咁上網睇資料. 知道有甲狀腺都好麻煩下.
特別係對於女士. 要懷孕比較難. 同埋又易早產小產.
仲要食藥會肥架.
對於本身已經好好肉地既我更加驚自己會係肥新娘..
又怕自己好難有bb.
因為本身已經係個經痛極嚴重的人. 近半年已經要食避孕藥控制情況.
成個人因為依件事好唔開心好擔心. 已經諗到要取消婚禮. 同埋要唔要同男朋友分手唔好害左佢好呢 ?
( 依度已經擔心到個人痴痴地. 事後俾男朋友知道都笑我  )
最後好好彩. 拎左報告知道冇事.
但問題係家庭醫生的藥對於要止暈既的一d 用都冇.
所以聽日又要去睇耳鼻喉專科啦 . 因為懷疑自己係耳水不平衡.
如果都係唔係就要入醫院做全身body check 啦.
所以今個月只係睇醫生都睇左我幾千蚊啦.
希望快d 知道咩事....日日咁暈真係好辛苦.

尋日仲要發覺經期亂哂. 明明今個月3 號先泥 period. 點知17 號又泥.
唔知係咪因為我依兩星期因為暈而停左避孕藥的關係呢.
煩死人了. 希望快d 搞返掂個身體啦.

拍拖日

今日同男朋友去拍拖. 難得早收工同佢食左個下午茶做晚餐,
間野在戲院對面. 叫普洱.
出名既係佢既飲品 "朱古力普洱"
試左都幾好味呀.
一人一個餐包一杯野飲再加多兩個小食都係$100樓下.
岩哂慳緊錢既我地.
如果可以多d 早放. 多d 去食tea 就好啦. hahaha

之後仲去睇埋寒戰 tim. 好好睇.
唔睇唔知原來梁家輝真係好好戲.
在我年代都好少睇到佢咩代表作咁
成套戲都好緊湊冇悶場. 我上forum 見好多人拎套戲同無間道比.
不過在我角度就中意依套多d. 因為我根本唔中意睇梁朝偉做戲~haha

♥ 囍 ♥ D.I.Y. ♥ Wedding Logo ♥

終於完成了我個 Wedding Logo 喇.

依一個花邊係我有次無意中見到download 落泥的..

之後一諗要整個 Logo 就諗到佢了.

依個 Logo 除左會在好多items 出現之外 . 仲會整埋做當面背景的名字牌.

因為男朋友個英文名其實在中學用過幾年之後. 佢出左社會都冇人咁叫佢

我唔想當晚放一個唔親切的名做背景. 所以打算用埋logo 去做背景啦.

依個 Logo 連字體都係用 Disneyland 既.

襯返 Tinker Bell 呀..

♥ 囍 ♥ D.I.Y. ♥ 敬酒香檳杯 - Part 1 ♥

又一個DIY ITEMS 啦.

依一對杯在淘寶買. 夾埋港幣 $90 左右.

不過質素真係好好. 同我在SOGO 睇幾百蚊一對的冇分別

一收到時真係包得好好. 我集運到香港都冇爛 (當然如果爛左. 賣家會再補發俾我)

之後同家姐兩個人夾手夾腳痴D 閃石上去.



依一個係半製成品. 因為打算會再痴高少少. 不過下次先再繼續啦.

對住D 閃否咁耐眼都盲呀. haha.

 

♥ 囍 ♥ D.I.Y. ♥ Menu (Part.1)

因為要落訂的項目好多都要留到出年的 3月.
所以依家就整住d DIY 既野先啦.
依個就係MENU 啦. 買左張粉綠的花紋紙. 貼上好厚的a4 紙板上 .
之後再一開為二. 就係我Menu 啦. 成本大約 $30
之後就買左依d 蛋糕花邊底紙. 再慢慢貼上去再剪.
就做到四個花邊的 Lace 角啦.
慳左好多時間. 唔駛用d Punch 慢慢壓個花邊出泥.
haha. 不過因為酒樓菜單未confirm. 而且只可以整到依到就停了.
遲d confirm 埋. print 好左就可以貼上去.
我仲打算加埋自己 個 wedding logo 上去 . 再加少少閃石. 咁就完成個menu 啦.
Part 2 應該要 2014 年先搞到.不過唔緊要啦. 我個後備物資櫃仲有好多位.
再唔係下一步我就會開始進攻男朋友屋企. hahaha.

超級著數的優惠呀 !!! ( 只限blog 友 )

我依個慳妹發現左樣野. 好岩各位b2b 用呀.
不過因為優惠有限. 所以私有化左.
大家有興建都要快d 去申請啦.
方法就係去以下依條link.
填好資料. 之後在約定的時間去到.
去到坐低慢慢睇下心水戒指.
無論你買唔買. 都會有$200 的sogo coupon
仲要係唔駛限消費幾多都可以用到. 限期去到 2015 年 tim ~

我同男朋友就在前幾日上左去啦 ( 記緊一定一定要預約. 同埋要留真實電話. 因為佢會打泥 confirm booking )
之後上到去仲有果汁有茶有水飲. 要填一份form. 不過份form 我只係填左英文名. 同埋結婚日子.
地址同埋哂酒樓咩攝影我都冇填俾佢.
之後試左一陣啦. 真係唔多岩心水就走了.
咁就成功拎左一張 $200 coupon.
因為間公司開張左未夠一個月. 所以依個優惠唔係好多人知架.
大家有興趣就快d 預約啦
https://www.iprimo.hk/form.php/reservation/

婚禮主題 - 小仙子 TinkerBell

本身諗左好耐. 究竟自己個婚禮主題顏色係咩好呢?
紫色我又覺得太高貴. 我同男朋友其實都唔係行成熟路線的人.
之後想要銀白. 但又怕太白太清會意頭唔好.
所以最後都係揀返我中意的卡通人物. 就係Tinkerbell 了. 即係粉綠色啦. 咁再襯埋粉紅色. 睇落就會好似仙境咁.
不過有d 無奈. 就係因為tinker bell 係冇男朋友既.
haha. 但唔理啦. 男朋友在依方面都由我. 最多結婚公仔搵返我另一個中意的 Preious Moments
但其實搵tinker bell 精品係一件好難的事. 因為佢本身出既產品唔多.
可以買既我好多都買哂. 甚至連 Swarovski 系列的鏈我都買埋. 可以做婚禮 or Prewedding 的首飾.

以下的就係部分的收藏品啦. 佢既野真係買哂都係得好少咁.

唉....應唔應該堅持呢 ?

其實在依個婚禮度. 我一直都好緊張個budget 問題.
好多items 我都去選擇一d 評價好. 收費合理既公司.
即係要我俾二萬蚊去搵人影相..我唔會.
同樣地俾五千去租花車影半個鐘...都唔會. 我唔介意用返男朋友架車.
亦唔會去搵 wedding planner. 因為我相信只要自己有心.
自己就係最好既 wedding planner. 冇野比之後落手落腳做更開心.
所以我無論 Candy Corner. Table Stand. Menu. Floor Plan ,人情箱都係自己整
每一樣的成本都捉得好緊.
好似Candy Corner 就會取代小禮物. (Budget $2000 )
Table Stand. Menu. Floor Plan . 人情箱全部成本都唔可以過 $200
樣樣野都咁慳. 就係因為慳到多D 錢去我心目中既蜜月地方
1) 芬蘭睇北極光
2) 大板/ 北海道
3) 馬爾代夫.

男朋友搵錢辛苦. 做女朋友既我只可以從慳入手啦.
係啦. 終於可以入正題啦 . 就係我堅唔堅持同渣打打長命戰好呢?
話說之前申請左信用卡去簽. 其中一張已經落左攝影的訂金. 只係爭千幾蚊就可以拎到 $500 現金回贈了.

偏偏渣打依個優惠. 我真係開始想放棄
由我 9 月開始申請 $ 400 COUPON 的時候. 佢話我得一個月的入息證明 ( 公司用支票出糧 ). 叫我俾多幾個月佢.
但問題來了. 我依個懶人一直都係用緊中二時期開的薄仔戶口. 所以我點樣去俾個證明佢呢?
我只可以俾到 9 月的證明. 之前的一直都冇..
咁渣打就叫我去拎公司糧單. 作為公司阿四的我當然好快就死左張糧單出泥啦.
但渣打又話我寫得太簡單. 唔接受.....好啦...拖拖下拖到過左我落酒樓訂的時間.
我亦發火打去CUT 左佢地個申請. 因為佢地一拖再拖真係令我好嬲.
點知到左十月初. 佢地又打泥叫我申請. 仲話今次 $800 個優惠好難得.
咁好啦. 我又中左佢地計. 今次就補多左一個月證明俾佢地.
點知佢地唔接受E-BANKING 的BANK STATMENT. 話因為個單只SHOW 戶口號碼. 冇我的名. 但問題係我住址證明就係銀行信. 有哂我名+戶口號碼 . 咁除非我偽造文件. 如果唔係有腦都知根本個戶口係我 !!!
之後佢地話唔得. 要MPF.證明. 我又俾MPF 佢地.....其實手寫版本唔接受我明白. 連電腦的都唔接受.
但我為左依 $800 我再忍 !!
之後依家佢話. 要埋我11月個證明. 依下我已經好無力. 我已經俾佢地拖到冇得去11月2-4日個婚展買餅卡.
要拖到下年 3 月先買. 點知佢個優惠又話只接受 2 個月簽 $4800.
即係我12月拎張卡. 我都唔可以拖到去 3月.
去到依一刻其實我已經好無力. 我打算唔理佢. 佢批到就批. 批唔到我就算啦.
因為 11月個婚展買唔到. 要去到 3 月我都唔駛咁心急.

點知.....岩岩佢地又打泥. 話因為我唔係七日內批到.
所以只可以得 $ 500. 我真係嬲到死呀. 邊有銀行咁架.
如果係七日唔批. 咁應該一早同我講. 早幾日我問時佢地又話冇問題
依家又叫我重新再申請. 即係第三次申請啦. 申請完又唔可以俾我簽到 3月個婚展.
咁我堅持左咁耐做乜呀.  嬲死我啦 !!!

♥ 囍 ♥ Candy Corner ♥ 糖果袋 ♥

淘寶另一收穫. 就係 CandyCorner 既袋啦.
買左總數 250 個. 雖然一定會用剩. 不過我本身都會成日整甜品所以唔成問題的.
今次入手價錢應該唔過 $100
大家有興建就去淘寶 search [ 平口袋 ]
咁就有好多款俾大家睇.. 其實有好多係有埋封口.
不過我打算將婚禮個 logo 整埋做貼紙封口.
所以就冇買個款. 但個款就比較方便賓客同衛生d 啦.

♥ 囍 ♥ 攝影錄影 ♥ 純美新娘 ♥

終於 confirm 搵返小寶了. 其實我家姐. 同我男朋友家姐都係搵小寶.
所以當我結婚時. 我第一個都係諗起佢.
不過想睇多d 野參考. 所以之前做左個好詳細的資料搜集.
搵左廿幾間的公司睇. 發覺最喜歡的都係小寶.
所以尋日見有半日假就去落埋訂啦.
咁岩又係見到老闆. 價錢其實非常合理啦.
STEVE 俾左個好好的價錢我. $8-9K 就有 2P1V. 仲要有埋高清攝影
我仲要講價. 講完再叫佢送多兩份禮物俾我. haha. 我都覺得自己好叻女.

依家確定左要小寶+樹哥+membo.

以下的就係禮物項目. 唔知可以點揀五樣
要加錢就通通唔要.即係唔要 5. 11.12.
當中 1 就一定要啦.
其餘 7.9.10 .13 都係好無聊的野..
所以得返 2.3.4.6.8.. 唔知在依度應該揀邊一樣唔要呀.
大家可唔可以俾d 意見我呢?

仲有. 上面提及的 EXECL 資料搜集表我整得好辛苦架.
費時公開影響到人地做生意.
又唔想浪費哂 D 心機. 所以大家可以留EMAIL 俾我.
我可以SEND 俾大家睇. 當多個參考啦.