♥ 囍 ♥ 證婚 ♥ 崩潰 !!!!!!

真係好無奈. 好失望加好傷心.
一直以泥我都好擔心證婚的問題.
因為雖然好中意九龍塘玻璃教堂. 但一直都覺得佢偏貴..
同埋一直都好擔心佢地的態度問題.
一次又一次咁去實地睇. 都冇辨法說服自己即落訂...
終於在早兩個月. 同男朋友傾左好耐.
男朋友叫我中意就去啦. 得半個鐘...佢地當日態度差既有個譜.
所以在岩岩 3月15號就同朋友仔去婚展落訂.
希望快快趣落埋訂就可以了埋件心事.
但結果當日我去到. 招呼我的係一個女仔.

我 : 唔該. 我想問依一日的日子. 仲有咩時間可以擇做證婚呀?
女:  我睇左. 兩點零鐘可以啦.
我:  兩點零鐘即係點. 即係兩點定係兩點半個場呀?
女:  應該兩點半呀.仲有你個日係特別日子. 要加收 $1000
我:  下 ?? 唔係wor. 我之前去你地教堂睇場時. 我問得好清楚你地話依一日唔駛收架.
女:  唔知wor...應該要架!
之後我見到平時Serve 開我的男仔.
我: 你問下個邊個的男人丫. 佢之前答我唔駛架.
結果個男人一知道我望到佢. 就行左去展板後面避我
女: 我問完啦...經理話要加收架...
我: 我之前去實地兩次問都唔駛. 依家要加收係岩岩轉價錢. 定係你地之前一直都答錯我??
女: 應該誤會掛....
我: 你地有冇小冊子. 宣傳單張可以俾我睇到. 你地一直都有依個收費?
女: 冇架. 我地d 小冊子未送到會場呀.

之後我冇再出聲. 因為我真係好無奈.
我問自己. 如果我真係要發癲同佢地嘈. 假設到頭來佢地又真係肯free 返我個一千蚊.
我又係咪真係會放心去book 佢地呢?
結果我諗左好耐. 我發覺依間野我已經再冇信心去幫襯.
就算我幾中意個教堂都好. 我都接受唔到佢地一次又一次的垃圾服務
我都係接受唔到用六千五去買佢地半個鐘.
所以我最後都係走左.
之後一直在場地行行行..結果俾我見到有另一個場地都係玻璃的建築物.
仲要有戶外室內揀. 而且仲在地鐵站隔離咋.
雖然價錢都唔平. 但只要有其他選擇. 我個心都安定好多.
希望之後個月得閒去睇場..可以快手d 搞掂埋依個項目啦.

♥ 囍 ♥ Book埋婚禮司儀啦 ♥

依一個項目又係拖左好耐.
人選係我家姐婚禮當日的司儀.
但我又懶...拖下拖下又一個月.
終於在尋日落左訂啦.
在搵司儀的過程入面...我做左好多資料搜查.
發覺好多人都冇預到司儀的預算.
大部分都係會搵朋友幫手.
無奈既係......我的朋友當中真係冇乜邊個係有做主持的經驗.
所以真係焗住要搵出面的人幫手. 雖然又係一筆額外的開支.
但在我心目中一個好的司儀係可以好好安排席前的事宜.
特別係男女家都要爭住影相時.
有個司儀做中間人係可以令到四位老人家都安心D.
到左開席時都有個人幫手帶領下氣氛.
我曾經出席三個婚宴.
第一個婚宴的司儀在席前的時候拎住個咪大大聲咁 :
( 新娘的阿姨舅父係時候出黎影相 )
之後當中一個阿姨就係我媽媽啦. 佢影完相第一時間就係行埋我身邊.
同我講叫我將來一定唔好搵個咁無禮貌的人.
第二個司儀在席前的時候  :
( 請女家的大陸親戚出泥影大合照喇 )
我在旁邊聽到..本身都唔覺得依句野有問題.
但事後我知道原來依一班大陸親戚不太滿意 [大陸] 依個字.
第三個就係婚禮開始了. 睇完成長片段
司儀就開始講好多好多廢話. 之後仲讀左一大段的歌詞出泥祝福對新人.
而我就在台下一直聽佢講廢話等食飯..到左最後. 個司儀竟然無關咪就同個經理講 :
( 好啦. 起菜啦 .) .
當然. 以上兩三單都唔一定係新人的朋友..第二個仲係專業的司儀.
但我真係俾依三個司儀嚇親啦.
專業司儀犯錯的機會當然都有. 但我諗當佢日日都主持大大小小的宴會.
犯錯的機會係會比較少既. 何況如果係朋友真係幫手.
我諗事前食飯開會. 同埋事後大利是一封都唔少呀.
思前想後都係算啦. 用幾千蚊去買多一個安心都值得的.
何況我 Book 的司儀都叫做睇過佢現場表現.
希望我結婚當日佢都可以有好表現啦 .

♥ 囍 ♥ 婚紗晚裝 ♥ Charming Image ♥

一直都好想快少少去決定租衫依個項目,
無奈因為太早book 會怕款式到我結婚個日已經唔同哂.
所以一直都拖拖拖. 早幾日終於得閒去試衫了.
我對婚紗晚裝的要求不多. 因為我覺得來來去去都係差唔多的款.
所以我見到 Charming Image 個10件 Package 就去試衫了.
反正可以免費試衫. 真係唔岩都可以走人.
當日我放工七點鐘就到了. 負責Serve 我的叫Kaki.
全程態度都好好. 不停拎衫俾我睇.
我睇完晚裝再睇婚紗. 之後睇埋褂同埋馬褂
再睇哂媽咪奶奶衫. 發覺好多款都好岩我心水.
Kaki 仲幫我Hold 起左套新褂. 
所以一睇完所有衫我就好快落訂了.
反正價錢我一早心中有數. 
而且最重要係可以一間店搞掂哂所有野. 
婚前一日可以一次過拎去酒樓放低. 婚後又可以還一次衫就可以了.
對於懶到爆的我真係好岩呀

等埋3月15日的婚展買埋餅卡. book 埋教堂.
要預約的野都搞得七七八八.
但最重要的Pre-Wedding 我竟然仲未落手去搵資料.
見到一大埋的Pre-Wedding 公司...真係頭都爆呀.