♥ 淘寶 ♥ Pre Wedding 婚紗 ( 2 )

第一次的淘寶 : http://blog.yahoo.com/miss.sugar/articles/683029/category/%E2%99%A5+%E6%B7%98%E5%AF%B6+%E2%99%A5

續上次淘婚紗之後. 我再淘多左件.
依件就平d . hkd 500 有了. 上次個件要 $650 到

網上圖 :

 

< 手套同埋頭紗都係淘嫁

< 頭紗好長. 好中意. 可以整到唔同效果

< 因為係自己著.. 所以後面綁帶好鬆. 腰位修得唔緊.
但如果有人幫自己著就ok 啦 ^_^

總括依件都好中意. 不過手工就比起對上一件造工比較粗糙了.

♥ 囍 ♥ 場地 ♥ 煌府 ( 國際都會海景廳 )

第一次睇場 :
http://blog.yahoo.com/miss.sugar/articles/680145/category/%E2%99%A5+%E5%9B%8D+%E2%99%A5+%E5%A0%B4%E5%9C%B0+%E2%99%A5

今日放工後同男朋友去到煌府 . 因為上一次我係同朋友去的.
但今次去完之後. 我係一定唔會揀依間了.
對佢地真係好失望. 話說上次係強哥serve 我地. 態度真係一讚.
今次. 明明夜晚食飯得四圍了. 有三位部長.強哥明明在我前面. 但佢地都另外搵一個女部長 [ Phoebe ] 泥招呼我地.
但我發覺佢係完全唔熟悉運作. 我問佢幾個問題

1. 如果我自來翅. 價錢會否有分別 ?
2. 如果菜單的魚轉班. 價錢又如何 ?
3. 會唔會有回門乳豬?

三個咁基本的問題. 佢都答唔到要搵人幫手.
之後坐低左正式傾個菜單.
發覺價錢都唔多合理

話說我打算係鷥鳳和嗚 / 金玉良緣. 但一問價錢真係有d 嚇一嚇.
如果鷥鳳和嗚 $ 6098 + $ 500 [ 最少的通脹 ] + $ 1300 [ 海班轉星班 ] 再加一. 即係 $ 8687. 之後再要加個飲品套餐 $650 . 即係 =  $ 9337.

價錢都算啦. 因為其實依家擺酒都要差唔多價錢. 雖然我覺得$9400 唔值得在依個地點+場地.
之後我就企在台前. 因為想同男朋友再睇清楚究竟擺25 圍會唔會好迫.
但Phoebe 再三提醒我地無必要數. 叫我地睇Floor Plan.
之後我都冇乜心機. 只係想真係睇清楚場地. 都要俾佢趕咁.
所以最後轉戰海逸酒店的景逸軒.

♥ 囍 ♥ 場地 ♥ 景逸軒 ( 紅磡海逸酒店 )

去完煌府之後轉去景逸軒.

優點:
1.地點方便. 而且出入地方都大. 唔駛迫電梯
2.有落地玻璃. 比較開揚
3. 24 圍. 冇柱遮擋
4. 場外都有好空曠的位置可以放海報等佈置

缺點 :
1. 新娘房極細. 係真係好細好細. Mua 想鬆動 D SET 頭都應該有困難.
2. 要自己搵人佈置背景
3. Candy Corner 唔俾放在場內.
4. 如果真係岩岩24 圍. 後面個場唔會開放埋. 所以有可能當晚有兩對新人同場擺酒.

至於價錢就$10,000 一圍到啦.
但未知食物質素如何.
而且我其實睇依個場地都係因為中意條長樓梯.
但我發覺原來長樓梯對住酒店的Reception.
感覺唔係太好. 可能因為真係好多行李同人會出出入入咁

想睇相片可到 : http://www.facebook.com/kingyathin#!/media/set/?set=a.302609943131908.69313.154225244637046&type=3

♥ 囍 ♥ 場地要求 ♥

由於同男朋友放假時間唔一樣. 我放WEEKEND. 佢放WEEKDAY.
變相好少有機會真係可以兩個一齊去睇場.
所以尋晚兩個人終於認真咁坐低去諗諗我地個場地要咩要求.

1. 交通方便.
尖沙咀同紅磡就最好. 因為我女家親戚大多係地鐵沿線. 男家親戚大多係火車沿線.
由於兩家人都唔係住香港島. 所以過海既一律都唔會.
又由於我個人喜好. 所以油尖旺都唔會諗了.

2. 唔想在地庫及避免爭電梯情況出現
如果有電梯唔希望有多人爭lift 的情況.
The One 好多場就係有依個缺點. 我唔想一散席全世界塞在電梯口
所以依方面.煌府的紅磡分店就做到
 
3. 開揚.
柱位相信好難避免. 但唔好太多. 而且我同男朋友都唔想四面都係牆.
感覺好似困獸鬥 [ 樓底高除外 ] . 所以最好係可以有落地窗. 依方面煌府的紅磡分店. 同埋皇上皇的北京道一號都做到.
P.S. 其實THEONE 好多場都得. 但係有爭電梯用的情況

4. 酒樓
酒店的裝潢係比較好. 食物就會比酒樓遜色.
但依家其實好多酒樓的裝潢都做得好好了. 太多婚宴專門店.
變相對酒店需求更加少. 再加上男朋友屋企人比較緊張酒席的食物質素
所以大多都唔會揀酒店了

其實我好想好想在一個場地有樓梯. 可能因為細個睇得卡通片多所以有依個情意結.
所以我當初心水係九龍灣國際展貿的煌府. 唔止有樓梯仲有空中花園可以註冊.
但地點實在太遠. 而且考慮到唔想老人家咁成日行上行落. 所以都係放棄左我最理想的場地.

而且我發覺我依幾個要求. 原來都幾難達到.
所以可以去睇場既地點真係少之又少....

♥ 淘寶 ♥ 花球 ♥

因為12 月就要影Pre- Wedding, 所以今次就淘埋花球.
下面兩個款二揀一.

最後揀左第二個. 收到實物圖都好滿意. 同相冇分別.
希望可以keep 得好d. 可以影多幾輯相啦.
價錢 : rmb 66 = hkd 83 左右啦.

 

 
< 最後揀左第二款. 依個係實物圖. 真係同佢提供的相片一樣. 哈哈.

♥ 淘寶 ♥ PreWedding 婚紗晚裝 ( 1 )

一直沉迷淘寶的我當然唔會放過淘婚紗啦.
不過依件其實早左好耐買. 男朋友同我求婚之前我已經靜雞雞買左啦.
哈哈. 依家諗返都覺得自己好傻. 因為當日收件時男朋友仲要在我屋企. 之後仲要親手幫我慢慢綁帶


淘寶官方圖 :

我收到的實物圖 :

<< 後面轉左做綁帶. 所以實岩著.
 
 << 影得好差. 但其實實物效果真係好好.

總括而言依件真係超正.
唔單止size fit 身而且用料都好足. 我唔駛加圈都已經好重好厚.
我打算著依件去迪欣湖 . 希望易出泥效果靚啦
但著之前應該要燙一燙. 不過唔知普通家用既燙斗有冇問題呢.

卡邦尼磨菇煙肉意粉 [ 附食譜 ]

依個意粉係我最愛整的西菜之一,
因為實在太簡單方便. 基本上半個小時就可以上碟喇.

男朋友同我都好中意食.
不過材料方面. 淡忌廉, 煙肉, 牛油 同芝士加加埋埋都係高熱量
如果減肥人士可以作出少少改動 !
牛油可以唔用 [ 當然味道會冇咁香 ]
芝士都可以用少d , 利用蒜鹽調味
淡忌廉亦可減至 180- 200 g . 當然意粉亦會較乾身
但唯獨是煙肉不可以隨便改動 . 但亦可以在處理時切走肥肉的.

材料: [ 2 人份量 ]
淡忌廉 250ml
磨菇 2 - 4 個
煙肉 適量 [ 我用左 3-4 條 ]
扁意粉/意粉 兩札
牛油 一小片
芝士 1-2 片 [ 亦可用碎芝士 ]
蛋黃 2 隻

1. 煲水 . 同時間將磨菇及煙肉切小片.
2. 滾水後. 加少許油及鹽 , 再加入意粉. 按照包裝上的時間烹煮. 撈起備用 [ 不用過冷河 ]
3. 熱鑊 , 炒香煙肉及磨菇 , 再調小火後加入淡忌廉 , 然後加入芝士片及牛油 , 調味
4. 熄火 , 加入蛋黃 , 放入意粉搞勻後上碟

♥ 囍 ♥ 場地 - 帝廷 ( 北京道一號 ) ♥

帝廷酒家

其實皇上皇依個場地對我來說都好熟悉,
因為三年前我姐姐都係在依個場地出嫁,
今日再去.裝潢當然唔同.背景好特別, 而且係我喜歡的粉紅色.
不過因為我掛住同經理講野. 完全唔記得影場地的照片.
只係有影佢個新娘房. 哈哈

優點:
1.尖沙咀好方便, 對面就係海港城, 唔驚賓客會悶.
2.全落地玻璃, 望到成個維港
3.菜單合理, 因為大日子當晚會自攜翅同魚, 所以對菜單的要求其實不大
4.最喜歡接待處的位置, 而且亦騰空了一個鄰近台前的位置作 Candy Corner

缺點:
1.因為我地揀左的日子係公眾假期, 尖沙咀會封路, 酒樓經理話應該要七時半大家就要入席了, 依方面安排怕會好煩好混亂
2.有柱.但有柱的地方都係靠近玻璃望海景. 有得必有失咁啦.
3.一定要25圍包場. 依方面仲等緊四個老人家決定.

 

 

 

脆脆棉花糖曲奇 [ 附食譜 ]

材料: (12個份量)

無鹽牛油 60g
呍呢嗱香油 1/3茶匙
棉花糖 90g
蛋汁 3湯匙
低筋麵粉 90g
發粉 半茶匙

製法:

1.將牛油及呍呢嗱香油，放進耐熱容器中，輕輕地蓋上微波爐保鮮紙，放進微波爐中以高火加熱20秒，然後倒進盛了棉花糖的碗中，加以攪拌至棉花糖須呈半融狀態。
[ 也可以利用煲煲滾牛油再加入棉花糖快手搞勻 ]

2.待溫度稍為降低後，一次過加進全部蛋液，再攪拌均勻，待用。

3.將麵粉及發粉篩入一個大碗中，加入棉花糖混合物，用橡皮刀以按壓的方式攪拌融合。

4.放進雪櫃冷藏1小時，方便定型。

5.把麵糊從雪櫃中取出，以湯匙舀取約一匙份量，放在已墊上牛油紙的焗盤上，修整成球狀。

6.最後，放入已預熱170度的焗爐，焗13分鐘，待涼即完成這款《脆脆棉花糖曲奇》。

注意：

• 棉花糖在烘焙過程中會融化，留下圓圓的孔洞及焦糖。

蒜泥白肉 [ 附食譜 ]

其實我一向都好中意食依個冷盤.
無奈我實在太唔中意食肥肉.
而且外面吃到的通常都加滿紅椒 !
所以始終都係自己整最好 .可以自己調味.
男朋友好愛這個冷盤呀 !
可能因為我今次買的豬肉片好新鮮. 同埋我真係只用熱水灼一灼熟就算 ~
所以肉質都ok . 雖然一定比唔上豬腩肉. 但相對地都健康很多 !

材料: (2人份)

豬肉片 適量
紅指天椒 2隻 (切粒)
蒜頭 一個 (切碎)
薑 1小塊(切碎)

醬汁料:

史雲生清雞湯 30ml
鎮江香醋 適量
砂糖 適量
紹興酒 15ml
生抽 15ml
老抽 少許
胡椒粉 少許
麻油 少許

做法:

1. 水滾放入豬肉片灼熟, 放入涷水過冷河 ,放上碟中排好
2. 將醬汁料調勻, 加入紅指天椒粒, 蒜粒, 薑碎撈勻即可

[ 食譜修改自 Miss Jubie ]

Lemon Cheese Bar 檸檬芝士餅 [ 附食譜 ]

餅底： [ 8 吋正方型模一個 ]
消化餅7塊
牛油溶液30g

芝士餡：
cream cheese 150g
蛋黃 1個
糖 10g
蛋白 1個
糖 25g
忌廉 20g < 我沒有加
檸檬汁 適量
檸檬皮 半個

做法：
預熱180度
1. cream cheese 加糖10g打軟, 加蛋黃打勻, 加忌廉拌勻, 加入檸檬汁及檸檬皮.
2. 蛋白加入25g糖打至濕發性, 加入芝士糊內.
3.入爐轉為170度隔水蒸焗40分鐘 , 雪硬切件即成

[ 食譜轉自 阿B ]

♥ 囍 ♥ D.I.Y. Pre-Wedding 小道具 ♥

早排上淘寶. 見到外國原來好多新人都會放一d 小道具在接待處俾賓客影相.

 

但我諗香港人應該冇咁流行. 所以我DIY 用作 Pre-Wedding 小道具好過.
因為上淘寶買. 最平都要 $50 .

所需道具 :
紅色卡紙A4 size 一張 $3
剪刀

 

其實只係需要在電腦PRINT 左D 嘴唇.
之後剪左再印上卡紙上再剪.
成個過程只需半個鐘. 成本只係幾蚊 ja.
不過係頭痛緊. 唔知用咩做d 小木棒好呢?

♥ 囍 ♥ 場地 - 煌府 ( 國際都會 ) ♥

煌府 ( 國際都會- 海景廳 )

話說個日睇完彩福. 之後就去左睇煌府了.

彩福皇宴篇 : http://blog.yahoo.com/miss.sugar/articles/680140/index

煌府網址 : http://www.palace-rest.hk/?ysmwa=wYEXUzhsElYzYf7aAsA2yCTgbyqpP4TXwUZda1EI10oK-j6r4oMz4Hfme-1QEOzW

個日去到煌府. 睇左一大輪.

優點:
1. 煌府態度真係唔同其他場地.
至少招呼我的部長好NICE. 有問必答.
2. 個場地都好好. 台好大. 新娘房超大.
3. 唔係成個場地都係四面牆. 有得望下街景 ( 望出去既地方係住宅. 都好靜. 唔會人來人往 )
4. 樓底都幾高.
5. 有機關. 但係對我泥講冇乜用. 因為我應該會正常MATCHIN 就算

缺點 :
1. 場地偏小. 佢話可以33 圍真係好迫. 我當日數過D 圍數. 我覺得22-24 圍先係合理圍數
2. 麻雀房唔係同一個場地. 要去另一個鋪位
3. 落地大玻璃望到商場走廊. 私隱度唔高

由於同未婚夫圍數應該都OVER 22 圍.
所以要放棄依個場地了

♥ 囍 ♥ 場地 - 紅磡彩福 ♥

彩福皇宴

網址 : http://www.choifookent.com/shopphoto_RB_HH.html

上個月同朋友仔去開紅磡. 順便就去睇場.
主要心水都係彩福同埋煌府

首先去既係彩福. 一入門口有貴妃椅幾靚.
但無奈在台上係睇唔到接待處的. 依一個我已經唔太中意.
入到去成個場都係紫色.
但係矮底偏矮. 同埋背景我認為有少少似7-80 年代的歌廳.

而且最神奇一樣野. 佢雖然講明係40 圍.
但其實只要一OVER 36 圍... 另外的 4 圍都係會在麻雀房擺的.
雖然我唔會有咁多圍. 但一聽到佢地咁既安排.
我就覺得依個集團唔多細心. 唔明白客人要既係咩.
所以最好都冇揀到啦. 疊埋心水去睇煌府好過

真係愈睇愈似歌廳...

北海道3.6牛奶布甸 [ 附食譜]

材料:

魚膠粉 6g +2湯匙水
北海道3.6牛奶 320ml
糖 35g
忌廉 150ml - 170ml (170ml 香 d )

做法 :
1.牛奶分半 160ml (另一半備用)
2.忌廉分半 75ml (另一半備用)
3.魚膠粉 6g +2湯匙水)備用
4. 1+2+3 放在熱水上加熱,之後加入糖,直到所有糖及魚膠溶晒.可離開熱水.
5. 將備用材料加入4入面.可入布甸樽,雪2小時可即食.

♥ 囍 ♥ D.I.Y. Welcome Board ♥

話說依個Welcome 真係搞到我一肚氣.
因為我係偶然上淘寶網. 之後見到依個Welcome 牌大清貨只係賣$14 . 加埋運費到香港都只係 $ 30 .
所以就買左. 但點知收到貨時斷開四截. 聯絡賣家但佢態度又唔好.

最後死死地氣自己用AA膠痴返好. 就開始DIY 啦.

所需材料如下 :  ( 冇掃可以用湯匙)

首先在牌上油白膠漿. 之後再用要慢慢用棉花棒塗均. 記住個邊邊位都一定要有. 如果唔係放左閃粉上去就一忽忽唔靚

上哂所有閃粉之後風乾一晚就完成.
但係因為閃粉太細粒了. 所以之後都唔好成日搞佢.
最好搵野包住再放在膠袋入面保存.要用先拎出泥

銅鑼燒 [ 附食譜 ]

上次在二德惠買左一大包紅豆蓉 .
整完紅豆燒餅之後仲剩低好多.
好彩好多甜品都會用到紅豆. 今次就整豆沙包 !
其實依個豆沙包係第二次整的.
因為第一次個食譜係沒有梳打粉. 而且是需要靜待 15 分鐘發酵的.
但我發覺麵糊是比較浠, 煎時亦比較難控制餅的大細.
厚度亦明顯較薄. 所以第二次我就用以下的食譜.
比較方便, 不用15 分鐘發酵 , 而且麵糊亦夠黏稠 !
煎出的餅好像麥當勞的熱香餅.
所以極力推介這個食譜 !

銅鑼燒(豆沙餅) (食譜來源 :吉斯蒂的幸福廚房)

材料 :- (約 6個份量)

A) 雞蛋 2隻, 黑糖 40g

B) 蜂蜜 1.5湯匙, 味醂 1湯匙, 菜油 1湯匙, 鹽 少許, 梳打粉 1/2茶匙

C) 低筋麵粉 90g, 粟粉 10g, 泡打粉 1/2茶匙, 清水 2湯匙

D) 即食日本豆沙 適量

做法 :-

1. 將雞蛋加入黑糖, 用打蛋器混合; 再加入材料 B 打發至起泡

2. 材料 C 的粉類過篩, 加入步驟 1 之混合物中, 再倒入清水輕手拌勻; 用隔過濾大顆粉粒備用 [ 圖1 ]

3. 燒熱鑊,下1湯匙粉漿, 小火煎至表面冒泡後, 翻面再煎約 40秒取出 [ 圖 2 ]

4. 在兩片燒餅中間夾上豆沙餡, 即成